(អង់ការ៉ា)៖ គ្រោះរញ្ជួយដីដែលបានវាយប្រហារប្រទេសតួរគី និងស៊ីរី គិតមកទល់ថ្ងៃអាទិត្យនេះមានរយ:ពេល២សប្ដាហ៍ហើយ ខណ:ដែលជនរងគ្រោះបាត់បង់ជីវិតសរុបកើនដល់ ៤៦,៤៤២នាក់ហើយ ក្នុងនោះអាផាតមិនប្រហែល ៣៤៥,០០០បន្ទប់នៅតួរគី ត្រូវបានបំផ្លិចបំផ្លាញ រួមជាមួយមនុស្សជាច្រើននាក់ទៀតនៅបន្តបាត់ខ្លួន។ នេះបើតាមការចេញផ្សាយដោយទីភ្នាក់ងារព័ត៌មាន AFP នៅថ្ងៃអាទិត្យ ទី១៩ ខែកុម្ភៈ ឆ្នាំ២០២៣។
រយៈពេល១២ថ្ងៃ ក្រោយគ្រោះរញ្ជួយដី មនុស្សនៅរស់ចំនួន៣នាក់ទៀត រួមមានទាំងក្មេងម្នាក់ផងដែរ ត្រូវបានជួយសង្គ្រោះពីក្រោមគំនរអគារ ក្នុងប្រទេសតួរគីកាលពីថ្ងៃសៅរ៍នេះ។ គិតត្រឹមពេលឥឡូវ តួលេខអ្នកស្លាប់នៅតួរគីគឺ ៤០,៦៤២នាក់ ខណៈស៉ីរីដែលនៅក្បែរខាងគ្នា មានជាង៥,៨០០០នាក់។ តួលេខអ្នកស្លាប់នៅស៉ីរីពុំបានប្រែប្រួលប៉ុន្មានថ្ងៃមកហើយ ស្របពេលដែលក្រុមសង្គ្រោះអន្តរជាតិភាគច្រើន បានចាកចេញពីតំបន់គ្រោះរញ្ជួយដីវិញហើយនោះ ក្រុមភ្នាក់ងារក្នុងស្រុកផ្ទាល់នៅតែកំពុងបន្តប្រតិបត្តិការដដែល ក្រោមក្តីសង្ឃឹមថានឹងអាចស្វែងរកអ្នកនៅរស់បន្ថែមទៀត។ ដោយឡែកទាំងតួកគីនិងស៉ីរី គឺពុំបានបញ្ជាក់ច្បាស់ថា មានមនុស្សប៉ុន្មាននាក់ ដែលនៅបាត់ខ្លួនឡើយ។
គួរបញ្ជាក់ថា កាលពីថ្ងៃព្រហស្បតិ៍សប្តាហ៍នេះ អង្គការសហប្រជាជាតិបានប្រកាសរៃអង្គាសថវិកាចំនួនជាង ១ពាន់លានដុល្លារ សម្រាប់ប្រតិបត្តិការសង្គ្រោះនៅក្នុងប្រទេសតួកគី ហើយក៏បានប្រកាសស្នើសុំ៤០០លានដុល្លារ សម្រាប់ប្រជាជនស៉ីរីដែលរងគ្រោះផងដែរ៕
